Act 13 | KYG | STEP | Atiyoki kotega siosile'mo mago Gotitegati gemo alini e'a ae'a hakalo hu'a hapa nepaiya vaya'e ali'a apaya ne'malaya vaya'e'mo mai'nae. Ani vaya'ai apaki'apimo hane'niye. Manamasi'agi anupa vekae hu'a agi ne'aya vekamo Simiyoni'agi Sailini kotega vekamo Lusi'agi Maneyeni'agi Solo'agi hu'a mai'nae. Maneyeni'a afalu'amo'mo Heloti'a vaya'ale'mo yagaino ne'apateya vekae.

Acts 13

Atiyoki kotega siosi vaya'mogi Manamasi'e Solo'e'mo ali'a anate'na'age'ana u'na'a gemae

1 Atiyoki kotega siosile'mo mago Gotitegati gemo alini e'a ae'a hakalo hu'a hapa nepaiya vaya'e ali'a apaya ne'malaya vaya'e'mo mai'nae. Ani vaya'ai apaki'apimo hane'niye. Manamasi'agi anupa vekae hu'a agi ne'aya vekamo Simiyoni'agi Sailini kotega vekamo Lusi'agi Maneyeni'agi Solo'agi hu'a mai'nae. Maneyeni'a afalu'amo'mo Heloti'a vaya'ale'mo yagaino ne'apateya vekae. 2 Ani vaya'mogimo Ala kava nefe'mo mono huge ne'ya'mo mosige hu'a mai'nageno'ae'mo Goti Auneme'amo aote Auneme'amo'mo hapa paino'ae'mo, Nagaemo Manamasi'e Solo'e'mo ali'ya'nimo alisa'afe'mo keya ae'nogi alitapa anaote anatege'anao, huno hapa pai'niye. 3 Ani gemo afite'apae'mo ne'ya'mo o'ne'a mosi'a mai'ne'a apaya'mo anakufale'mo male'ne'a nunumu'mo hute'a ali'a anaote'mo anate'nage'ana u'na'ae.

Saipalasi kotegamo u'ana mai'na'a gemae

4 Goti Auneme'amo'mo alino anate'nige'ana Manamasi'e Solo'e'mo lami'ana Selusiya taonifi'mo u'ana ava'yi hute'ana sipifi'mo haite'ana ani'mo lakae'ana Saipalasi ani ago'nanena u'na'ae. 5 Salamisi taonifi'mo u'ana ava'yi hute'anae'mo muki Yu vaya'ai mono nopi'e nopi'e'mo u'e'a hu'ana Goti ge'amo ae'ana hakalo hu'ana hapa pai'na'ae. Yoni Maki'a hana maeno ali'ya'mo alisiyafe'mo magokepi lokae'a mai'nae. 6 Apakaemo magayaga faliga ani haigifi'mo hane'niya taonifi'mo ali'a atale'a mugagaya ani ago'nanena haigifi'mo hane'niya taonifi'mo Pefosi kotegamo u'a mai'nae. Mago vekamo agi'amo Ma Yesu'a ani taonifi'mo mai'nige'a age'nae. Agaemo hosu apaune vaya'ai himamu'apileti'mo no'agaya aeto agufa aune kava'mo nehiya vekamo Yu nofi vekamo mai'neno'ae'mo, Gotitegati gemo alini'ne'na ae'na hakalo hu'na hapa nepauva vekamo mai'nove, huno hapa pai'niya'monanafa aigofe vekamo mai'niye. 7 Ani vekamo ani ago'nanenafi'mo hane'niya kote'mo yagaino ne'apateya vekamo agi'amo Sesi'asi Polasi'a ao vekamo mai'niye. Sesi'asi Polasi'a alagepa huno agesa afi'niya vekae. Agaemo Goti ge'amo afisiyafe'mo Manamasi'e Solo'efe'mo ge hu'nige'ana e'na'ae. 8 E'ana mai'na'ageno'ae'mo hosu apaune vaya'ai himamu'apileti'mo no'agaya aeto agufa aune kava'mo nehiya vekamo agi'amo Galiki gefati'mo Elimasi'a yagaino ne'apateya vekamo'a agesa afino fatago osisiyafe'mo alino afepi anate'niye. 9 Ani kava'mo hu'niya'mofe'mo Goti Auneme'amo'mo Solo'a alu agi'amo Polo aipafi'mo haino havai te'nigeno'ae'mo aulu haeno ageteno'ae'mo, 10 Satani mafa'neyo, huno, Kagaemo alagepa kava'mo kame'amo mai'nane. Aigofe kavakamo'e hosu kavakamo'e'mo kagae kaipafi'mo havai te'niye. Ala kava ne'mo fatago kava'amo alika kayagi kayaga huka ne'atane. 11 Ala kava ne'mo'a hemenimo kamagisigeno kaulagala'mo ali hisigeka mago afina'mo ha le ya'mo o'ageka afa'a maigane, huno ha nepaigeno'ae'mo aulagala'mo ago ali hu'nigeno hiyakana huno hani ya'mo'a aulagalapi'mo aino ati kae'niye. Agaemo uno mago vekae'mo ge hisigeno ayate alinino visiyafe'mo kahauya hisiyafe'mo u'niye. 12 Yagaino ne'apateya vekamo'a ani kava'mo ageteno'ae'mo agesa afino fatago hu'niye. Agaemo Ala kava ne'mo ge'amo afiteno'ae'mo hau ai'niye.

Manamasi'e Solo'e'mo Atiyoki taonifi'mo Pisitiya kotegamo u'na'a gemae

13 Polo'e avagi vekala'e'mo Pefosi kotega atale'a sipifi'mo u'a Pega taonifi'mo Pamifiliya kotegamo u'a ava'yi hute'a Yoni Maki'a anataleno atagi neno Yulusalemu taonifi'mo u'niye. 14 Pega taonifi'mo atale u'ana Atiyoki kotega taonimo Pisitiya kotegamo u'ana ava'yi hute'ana Sapati afina'mo Yu vaya'ai mono nopi'mo hai'na'ae. 15 Mago vaya'mogimo Goti Mukufati'mo Mosese ke'aepa gemo lekana paite'a Gotitegati gemo alini e'a ae'a hakalo hu'a hapa nepaiya vaya'mogimo avo'mo kae male'naya ge'e'mo lekana pai'nae. Lekana pai'a hano hute'apae'mo monote'mo ne'yagaiya vaya'mogimo mago vekamo ali'a ate'nageno anakaetegamo eno, Konagalane, huno, Mago geleti'mo alitana he titana latesa'ageta akame hisuna agufa gemo hane'nisiya'mo'mo laha pai'ao, huno hana pai'nigeno 16 Polo'a he tino aya'mo ataleteno aepa faino hapa paino'ae'mo, Isaleli vaya'nimogitapa'e alu nofi vaya'mo Gotife'mo mono nehaya vaya'mogitapa'e'mo ge'nimo afiyo. 17 Isaleli vaya'ai Goti'apimo'a laginago vaya'mo lekana paino apateteno Isipi kotega nata ne'u'a mai'naya afina'mo asole vaya'mo alino apatege'a afole ai'nae. Goti'a himamu lokiya'aleti'mo Isipi kotegati'mo apavalelino e'niye. 18 Apakaemo foti'a kafugamo ka'me kotega mai'ne'apae'mo hosu kava'mo hu'naya'monanafa o'apataleno hapa mae'niye. 19 Goti'a hapa mae'nige'apae'mo seveni'a nofi vaya'mogi Kenani kotega vaya'mo hapafai'a hapaetale'a apakae mopamo ali'nae. 20 Agaemo agoti gemo ne'afiya vaya'mo apavaleno apami'nige'apae'mo fo hataleti fifiti'a kafugamo yagai'a apateme apateme ne'ageno'ae'mo Samiyo'a Gotitegati gemo alinineno aeno hakalo huno hapa nepaiya vekamo afole ai'niye. 21 Henaga'amo apakaemo Gotife'mo, mago kini vekamo'a yagaino latesiyafe'mo avaleka lamiyo, hu'a ge hu'nageno Goti'a yagaino apatesiya kini vekamo agi'amo Solo'a Kisi mafa'ne'amo Menisameni nofi vayapati vekamo avaleno apami'nigeno foti'a kafugamo yagaino apate'niye. 22 Goti'a Solo'mo alino ha faitaleno Nevini'a yagaino apatesiyafe'mo alino he tino ate'niye. Goti'a Nevinife'mo ava gemo huno'ae'mo,Nevini'a Yesi mafa'ne'ae'mo nahau nayamopafi'mo nahau'niyanageno muki ge'nimo afa'a akame hugiye, huno hu'niye. 23 Goti'a hogoteno huno'ae'mo, Nevini aginago vayapati'mo lapa maesiya vekamo ali'na afole ai'na ategauve, huno hu'niya gelefe'mo akame huno Yesu'a Nevini aginagomo Isaleli vaya'ai apakufamo alino katino apatesiya vekamo alino afole aino ate'niye. 24 Yesu'a ali'ya'amo aepa faino o'ali'nigeno'ae'mo Yoni'a muki Isaleli vaya'aife'mo, lapaipamo alitapa afe letetapa ani'mo faleyo, huno aeno hakalo huno hapa paino mai'niye. 25 Yoni'a ali'ya'amo alagi hogo'amo hano hugefe'mo hu'nigeno'ae'mo, Nagaefe'mo ina la'nae, hutapa lapakesa ne'afiye. Lapakaemo agava mai'naya vekamo o'mai'nove. Afiyo, huno, nagae nakamelegati'mo egaiye. Nagaemo ina agufa vekamo mai'novanage'na su'mo nofi'amo afa'a hakalu osegauve, huno hapa pai'niye. 26 Konaga'nimogitapae, huno, Emalehamu aginago vaya'e alu nofi vaya'mogitapa Gotife'mo mono nehaya vaya'mogitapa'e'mo afiyo. Goti'a ani alagepa ge'amo vaya'ai apakufamo alino katino apatesiya gemo ago alino ate'nigeno lapakaetegamo e'niye. 27 Yulusalemu taonifi'mo mai'naya vaya'e yagai'a ne'apataya vaya'apimogi'e'mo Kalaisi ne'mo mai'niye, hu'a o'age'a Gotitegati gemo alini e'a ae'a hakalo hu'a hapa nepaiya vaya'mogi avo'mo kae male'naya gemo muki sapati afina'mo lekana nepaiya gemo aepa'amo o'afi'naya'mofe'mo amagiyo, hu'a hu'naya geleti'mo hogote'a ago avo'mo kae male'naya gemo ali'a afole ai'a ate'nae. 28 Apakaemo amagisageno falisiya agufa hosu kava'amo o'age'naya'monanafa Pailatife'mo, amagiyo, amagiyo, hu'a hu'nae. 29 Goti Mukufati'mo Yesufe'mo ava gemo hu'apae'mo, Ani kava'mo afole aigiye, hu'a hu'naya agufa kava'mo agaetegamo hute'apae'mo nilimo ai'a akai'a alini u'a ki'a ate'naya'monanafa 30 Goti'a ago alino he tino ate'niye. 31 Agaemo Galeliya kotegati e'a Yulusalemu taonifi'mo lokaeli'a e'naya vaya'ai apaulagale'mo muki afinapati'mo alu afina'ae alu afina'ae'mo afole aite afole aite huno mai'nige'a age'nae. Ani vaya'mogimo age'naya kavafe'mo ava gemo hu'a ae'a hakalo hu'a hapa nepaiya vaya'mo mai'nae. 32 La'agaemo alagepa faigoko gemo lapa paita'ae'mo, Goti'a laginago vaya'aife'mo lapa maesuvafe'mo ani kava'mo huguve, huno hapa pai'niya kava'mo apakinago vaya'mogitalefeke'mo, Yesu'mo ago alino he tino ate'niye. Ani kavafe'mo Goti mukufi'mo napa tu Samu gemo'a huno'ae'mo,

Hemeni afina'mo ali'na kate'nogeka mafa'ne'nimo mai'nane, huno hu'niye,
huno Samu mukufi'mo avo'mo kae male'niye. 34 Goti'a Yesu agufamo okasalisiyafe'mo alino he tino ate'niya kavafe'mo huno'ae'mo,

Afa'a lapa maete'na aote ya'mo hanege hanege huno hanesiya ya'mo ali'na lapamiguve. Nevinife'mo ali'na kamiguve, hu'na ha pai'nova ya'mo ali'na lapamiguve, huno hu'niye,
huno avo'mo kae male'niye. 35 Nevini'a mago'e gemo Goti Mukufi'mo avo'mo kae male'niya gemo'a huno'ae'mo,

Ali'yakamo ne'aliya vekamo aote vekamo o'ataleka ha maesanageno agufamo okasaligiye,
huno hu'niye. 36 Nevini'a Goti ge'amo akame huteno ma mopafi'mo agae'e'mo lokae'a mai'naya vaya'mo hapa maeteno au kale'nige'a aginago vaya'e'mo ki'a ate'nageno agufa'amo ago kasali'niye. 37 Nevini agufa'amo ago kasali'niya'monanafa Goti'a alino he tino ate'niya vekamo agufa'amo okasali'niye. 38 Konaga'nimogitapae, huno, Goti'a alino he tino ate'niya'mofe'mo ani vekamo agi'aleti'mo hosu kavatapimo afa'a alino atalegaiye, hu'na ae'na hakalo hu'na lapa nepauve. Goti'a Mosese ke'aepa gemo akame nehaya kavateti'mo hosu kavatapimo afa'a alino ataleteno naulagale'mo fatago vaya'mo mai'nae, huno osugiye. Osugiya'monanafa Goti'a ani vekae'mo apakesa afi'a fatago nehaya vaya'aifeke'mo, muki hosu kavatapimo ali'na atale'nogetapa naulagale'mo fatago vaya'mo mai'nae, huno hapa nepaiye. 40 Ani gemo lapa nepauva'mofe'mo Gotitegati gemo alini e'a ae'a hakalo hu'a hapa nepaiya vaya'mogi Goti Mukufi'mo avo'mo kae male'naya agufa kava'mo lapakufale'mo afole o'aisiyafe'mo ehetapiye. 41 Ani gemo avo'mo kae male'niya gemo'a huno'ae'mo,

Ge'nie'mo huta faipa hutapa ne'ataya vaya'mogitapamo afiyo, huno, Nagaemo lapaulagale'mo nehuva kavafe'mo ava gemo hu'a ali'a lapaya ne'malagetapae'mo lapakesa afitapa fatago nosaya'mofe'mo lapau aitetapa faliyo, huno hu'niye,
huno avo'mo kae male'niye, huno hapa pai'niye. 42 Yu vaya'mo mono nopati'mo atale'a nelamige'apae'mo alu nofi vaya'mogimo, Mago anaga Sapatifi'mo etana ani gemo mago'e hutana laha pai'ao, hu'a hana pai'na'ae. 43 Ali'a anupa hu'a mai'naya vaya'mogimo afi'nayana ani gemo aino atagu fae'nige'a afite'a asole Yu vaya'e alu nofi vaya'mogi Yu mono gemo ne'afiya vaya'mogi'e'mo Polo'e Manamasi'e'mo anakame hu'nage'anae'mo, Goti'a fiku hapa maeno ne'apamiya kavafe'mo ava gemo o'ataletapa atafauta alagi hutapa maiyo, hu'ana apakesa ali'ana hapa pai'na'ae. 44 Mago anaga sapatifi'mo ani taonifi'mo aise vaya'atomo afa'a mai'naya'monanafa asole vaya'mogimo Ala kava ne'mo ge'amo afisayafe'mo e'nae. 45 Asole vaya'mo e'a mai'nage'a Yu vaya'mogi apakete'apae'mo apaipa kafamo hanae'nage'a Polo ge'amo amagi'a atalete'a Polofe'mo hu'a faipa hu'a ate'naya'monanafa 46 Polo'e Manamasi'e'mo koli osu'ana lokiya gefati'mo hapa pai'anae'mo, la'agaemo Goti ge'amo hogoteta'a lapa paisu'a kava'mo hane'niya'monanafa Goti gelegamo lapakame'ya amitetapae'mo ani kava'mo hutapa lapakaitapimo agoti hutapa lapatetetapae'mo, hosu vaya'mo mai'nonanageta maige maige huta maisuna vaya'mo o'mai'none, hutapa nehaya'mofe'mo lapataletuta'a alu nofi vaya'aife'mo hapa paigu'ae. 47 Ala kava ne'mo'a Muku'afi'mo hane'niya ge'aleti'mo huno'ae'mo, alu nofi vaya'aitegamo utapa hapa paiyo, huno laha pai'niye. Ani gemo'a huno'ae'mo,

Nagaemo ma mopafi muki haopalegamo mai'naya vaya'ai apakufamo alino katino apatesiyafe'mo alu nofi vaya'ai ha le ya'apigana huka maigane, hu'na ali'na kate'nove,
huno hu'niye. 48 Alu nofi vaya'mogimo ani gemo afite'a apamogaga aite'apae'mo, ani gemo Goti ge'amo alagepa gemo hane'niye, hu'a hute'a Ala kava ne'mo ge'ale'mo ali'a asaga hu'a ate'nae. Goti'a alagepa hu'a maige maige hu'a maisayafe'mo lekana paino ne'apateya vaya'mogi apakesa afi'a fatago hu'nae. 49 Ala kava ne'mo ge'amo ani haopalegamo aino atagu faenuneno hu'niya'monanafa 50 Yu vaya'mo ala apaki vaya'e mono nehaya a'nemo apaki hane'niya a'nemogi'e'mo apakesa fai'apae'mo, anamagigune, hu'a hute'a ali'a hana faitala'age'ana u'na'ae. 51 Apa vekala'moganimo apakaetegamo aune kava'mo hu'anae'mo mumusopamo anaiya agusalegati'mo ali'ana kalo paetale'ana atale'ana Aikoniyamu taonifi'mo u'na'ae. 52 U'na'age'apae'mo Goti ge'amo ne'afiya vaya'mogimo lusi kava hu'a apamogaga ai'nageno'ae'mo Goti Auneme'amo'mo apaipafi'mo haino havai te'niye.